Ginmandu-an sang Department of Agriculture (DA) ang Food Terminals Inc. (FTI) nga magbakal sang sibuyas halin sa mga lokal nga mangunguma agud malikawan ang pagsarurot sang farmgate price samtang nagahilapit ang panahon sang anihan.
Suno kay Agriculture Secretary Francisco Tiu Laurel Jr., ginpadala na ang team sang FTI sa Nueva Ecija agud siguraduhon ang bastante nga cold storage, sa diin nga sa subong may kapasidad nga 50,000 28-kilo bags kag mahimo nga madugangan kun kinahanglanon. Ginalantaw man ang iban pa nga mga probinsya kasubong sang Occidental Mindoro, Pangasinan, kag Cagayan Valley para suportahan ang mga presyo kag ipabilin nga patas ang baklanay.
Ginsiling naman ni FTI President Joseph Lo nga baklon nila ang red kag white onions sa fair market value agud magka-income ang mga mangunguma kag mapabilin ang ila nga interes sa pagpananom. Sa Nueva Ecija, nagsaka na sa P45 kada kilo ang farmgate price sang sibuyas kasunod sang kasiguraduhan sang intervention sang gobyerno.
Suno sa DA, pamaagi sang pagbakal sang FTI kag pagpalapad sang cold storage, magaserbe nga buffer buyer ang kumpanya agud tupungon ang suplay kag buhinan ang pagbag-o-bag-o nga presyo.
