ROXAS CITY – Nagpanawagan si Agriculture Secretary Francisco P. Tiu Laurel Jr., sa publiko nga indi pag-abusuhon ang
ang P29 Program.
Ang P29 Program ang isa ka inisyatibo ni Presidente Ferdinand Marcos Jr., nga tinutuyo nga maghatag sang de-kalidad nga bugas sa balor nga P29 kada kilo sa mga pili nga benepisyaryo kalakip ang mga miyembro sang 4Ps, solo parent, kag senior citizen.
Ginpahayag ni Secretary Tiu Laurel nga importante nga malikawan ang pagpang-abuso sa nasambit nga programa, kaangay sang pagbaligya sang mga benepisyaryo sang bugas nga ginbakal sa mas manubo nga presyo.
Pahayag pa sini nga luyag siguraduhon sang DA nga ang pinakamadamo nga numero sang mga yara sa pigado nga sektor ang magabenepisyo sa amo nga programa nga sang gobyerno.
Sumugod subong nga adlaw, mahimo na nga makabakal sang tig-29 kada kilo sang bugas sa mga Kadiwa centers sa Metro Manila kag Bulacan.
Ini ang patigayunon kada Biyernes, Sabado, kag Dominggo umpisa alas-8 sang aga tubtob alas-5 sang hapon.
Yara sa 10 ka kilo ang mahimo nga mabakal sang mga benepisyaryo sa sulod sang isa ka bulan. Ginpahanumduman naman nga magdala sang ID ang mga magabakal sang bugas.
