Ginsuhestyon sang Department of Agriculture ang temporaryo nga pag-untat sang pag-import sang bugas samtang ginaduso ang pagtaas sang taripa sa mga gina-import nga bugas, suno sa Malacañang.
Suno kay Presidential Communications Office (PCO) Secretary Dave Gomez, katuyuan sang amo nga tikang ang pag-proteher sa mga lokal nga mangunguma.
Ginsiling sini nga igatalakay sang Gabinete ang madasigan nga pag-istoryahanay kaupod si Presidente Ferdinand Marcos Jr. sa iya nga state visit sa India.
Ginbasol sang mga mangunguma ang manubo nga presyo sang humay sa pagdamo sang mga ginapang-import nga bugas, nga wala ginalimitahan sang gobyerno apang ginpatungan sang taripa.
Una na nga ginsiling sang Department of Agriculture nga i-rekomenda sini nga ipasaka amat-amat ang taripa sa gina-import nga bugas halin sa 15 porsyento tubtob sa 25 porsyento antes ang masunod nga panahon sang tag-alani.
Suno kay Agriculture Assistant Secretary Joycel Panlilio, ang liwat nga pagpatuman sang 25 porsyento nga taripa ang magapataas sang presyo sang imported nga bugas kag magahatag sang dalan sa mga mangunguma nga mabaligya ang ila nga ani sa mas makatarungan nga balor.
