Plano ni Department of Agriculture Secretary Francisco P. Tiu Laurel Jr. nga kakason na ang mga brand label kaangay sang ‘premium’ kag ‘special’ nagikan sa imported rice.
Bangud nagapati ang sekretaryo nga ginagamit lamang sang mga rice trader ang mga nasambit label agud pataason ang presyo sang bugas ilabi na sa retail level.
Suno kay Laurel, matapos ang ginpatigayon nga serye sang konsultasyon kag pagbisita sa mga merkado, ila natumod ang paggamit sang mga retailer kag mga
trader sa mga label agud lamang hatagan sang rason ang ila ginplastar nga mataas nga presyo.
Mahibaluan nga pinaagi sa label, kaangay nga ginapalasa sang mga retailer ang mga konsyumer.
Bangud diri, mas maayo suno kay Laurel nga kakason na lamang ini agud indi mangin rason sa padayon nga pagpangtunto sa bumalakal.
Samtang, nagpanindugan man ini nga ang pag-import sang bugas indi isa ka kinamatarong kundi isa ka
probilehiyo.
Pananglitan suno diri nga indi luyag ang mga trader nga magsunod sa mga regulasyon sang pungsod, posible nga punggan sang ahensya ang pagpaguha sang permit para sa rice importation.
Matandaan nga nagpaandam ang sekretaryo sa mga importer kag mga trader nga kanselahon ang ila importation permit kung mapaslawan sila nga magsunod sa regulasyon ukon mapamatud-an nga ginsabutahe ang supply kag presyuhanay sang bugas sa mga merkado.
