ROXAS CITY – Ginpangunahan ni Capiz Police Provincial Office Director Canilo Fuentes ang pag-dispose sang daan kag indi na otorisado nga uniporme sang mga pulis sa probinsya sang Capiz.
Sa isa ka seremonya sa Camp Teodorico Apil sa Barangay Lanot sining syudad, ginpangunahan ni Colonel Fuentes ang pag-gunting sa mga daan kag pug-is nga uniporme sang kapulisan.
Suno sa opisyal, kinahanglan sundon sang mga pulis ang prescribed uniform sandig sa “Letter of Instruction (LOI) Tamang Bihis” sang Philippine National Police (PNP).
Ginpahayag pa sini nga isa ini ka pamaagi agud makuha sang mga ini ang pagsalig kag respeto sang pumuluyo nga ila gina-serbisyuhan.
Gindugang pa sang opisyal nga indi mahimo ipanghatag ang daan nga uniporme sang mga pulis bangud mahimo ini magamit sang iban sa malain nga mga butang nga makapalain sa imahe sang PNP.
Matapos ang ginpatigayon nga pagsamad sa nasambit nga mga uniporme, gilayon ini nga ginlubong agud indi na magamit pa.
Mahibaluan nga nagabaton sang P18,000 nga clothing allowance ang mga pulis kada tuig.
