Preso ang 48-anyos nga lalaki matapos nga ginapahayag gin-rape sini ang 15-anyos nga dalagita sa sulod sang CR sa isa ka gasolinahan sa Marikina City.
Ang Marikina Police mismo ang nakatalupangod sang makaduluda sa may gasolinahan matapos nila nga masiplatan ang menor de edad nga utod sang biktima.
Kasagsagan sang curfew alas 10:30 sang gab-i sang makit-an sang pulisya ang utod sang biktima sa sulod sang CR. Sang ginpalapitan ini sang mga pulis, ginpahayag sang bata nga ginahulat niya ang iya nga utod nga ara sa sulod sang banyo.
Makaligad ang pila ka minutos, hinali nga nagguwa ang suspek gikan sa CR kasunod ang dalagita. Didto kag nagduda ang pulisya kag gilayon nga ginhibalo ang natabo.
Suno kay Police Colonel Geoffrey Fernandez, hepe sang Marikina Police, gintuad sang bata nga halin sa CR nga ginhalukan ini sang suspek sang makaduwa ka beses, pagkatapos gin-uyatan ang sensitibo nga parte sang lawas sang biktima kag nag-angkon sang total penetration.
Gintuad pa sang menor de edad sa kapulisan nga pagkatapos sang natabo nga pagpanglugos sa sulod sang CR, ginhatagan siya sang suspek sang ₱150.
Depensa naman sang suspek, nagaahit ini sa amo nga CR kag wala sini natalupangdan nga ara man sa sulod ang biktima. Ginpanginwala sini nga gin-rape niya ang biktima nga suno sa iya madugay na niya nga kakilala bangud masami ini nga nagapakalimos sa iya.
Yara na sa kustodiya sang Marikina City Police Custodial Facility ang suspek nga magapangatubang sa kaso nga statutory rape.
