Dance protest sa One Billion Rising Revolution patigayunon kadungan sang Valentine’s day

ROXAS CITY – Isa ka dance protest ang patigayunon sang mga kababainhan sa syudad sang Roxas kadungan sang selebrasyon sang Valentine’s Day

Liwat nga magatipon ang grupo sang mga kababaihan sa atubang sang kapitolyo probinsiyal para sa One Billion Rising Revolution.

Suno kay Mrs. Elma Deanon, chairperson sang Gabriela-Capiz ginalauman nila ang pagpasakup sang kapin 3,000 ka mga kababainhan gikan sa magkatuhay nga sektor.

Pinaagi sa pagsaut mapalab-ot ang tinutuyo sang grupo para mapauntat na ang kalakasan kag pagpang-abuso sa mga kababainhan.

Nagalaum si Deanon nga mangin alagyan ang dance protest para mapukaw ang balatyagon kag paminsaron sang tanan kag makita ang importansiya sang mga kababainhan sa sosyudad.