ROXAS CITY-Nagpamalibad nga maghatag sang pahayag ang alkalde sang banwa sang Dao natuhoy sa paglakalip sini sa mga Local Chief Executives nga ginpapanaugan sang show cause order sang Department of the Interior and Local Government ukon DILG.
Suno kay Vice Mayor Joselito Escutin nga indi pa luyag ni Mayor Ernesto Escutin nga maghatag sang sabat bangud wala pa sini nabaton ang kopya sang show cause order kag wala pa nakita ang kaundan sini.
Apang aminado si Vice Mayor Escutin mga ginkakibot sini ang natabo bangud wala ini sang ideya sa ginpapanaug sang DILG mangin ang mga empleyado sang munisipyo.
Gindugang pa sini nga wala man siya sang may nadumduman nga may ginlapas ang alkalde sa pagsulundan sa pagpatuman sang Inter-Agency Task Force (IATF) guidelines.
Nagpasalig naman ang kampo ni Escutin nga pagasabton ang nasambit nga isyu sa tion nga makakuha sang kopya sang show cause order.
Matandaan nga ginpapanaugan sang DILG sang show cause order si Mayor Escutin bangud sa ginapahayag paglapas sini sa IATF guidelines.
Kalakip man sa mga ginpapanaugan sang show cause order amo sanday Abra Governor Jocelyn Bernos, Antique Governor Rhodora Cadaiao, Bukidnon Governor Jose Maria Zubiri, Noveleta Cavite Mayor Dino Reyes Chua, Talisay Batangas Mayor Gerry Natanuan kag Olongapo City Mayor Rolen Paulino.
