Naglab-ot na sa masobra 800 katawo ang napatay kag masobra 2,800 ka mga pilason pagkatapos sang magnitude 6.0 nga linog nga nag-igo sa sidlangan nga bahin sang Afghanistan sang Lunes, Septyembre 1, 2025.
Ang kalamidad labi nga nagpabug-at sa gobyerno sang Taliban, nga naga-atubang na sang tuman ka grabe nga krisis pareho sang tiggulutom, pagnubo sang internasyonal nga bulig kag ang pilit nga pagbalik sang mga Afghan gikan sa kaiping nga mga pungsod.
Suno sa health ministry spokesperson nga si Sharafat Zaman, kinahanglan nila ang bulig gikan sa nagkalain-lain nga pungsod agud masabat ang kadakuon sang kahalitan.
Narekord naman ang pinakagrabe nga kahalitan sa a probinsya sang Kunar kag Nangarhar, sa diin tatlo ka mga baryo sa Kunar ang lubos nga naguba. Yara naman sa 610 ang napatay sa Kunar kag 12 sa Nangarhar.
Suno sa Ministry of Defense, 40 ka rescue flights ang ginhimo, nga nag-evacuate sang ginabanta 420 ka mga tawo nga napatay kag napilasan.
Matandaan nga humalin sang nagpungko ang grupo sang Taliban sang 2021, ini na ang ikatatlo nga dalagku nga linog nga nag-igo sa pungsod.
Apang, ang humanitarian aid nagnubo sang daku — halin sa $3.8 bilyones sang 2022, nagnubo lamang ini sa $767 milyones sini nga tuig.
