Naglab-ot na sa 24 ang napatay bangud sa makahalalit nga pagbaha sa Texas, USA.
Nagbilin man ini sang madamo nga nadula nga mga dalagita gikan sa Cristian summer camp.
Bangud sini,isa ka daku nga operasyon sa pagpangita kag pagluwas ang ginahimo sa estado. Lakip sa mga nadula amo ang 25 ka kabataan nga nalakip sa 750 ka mga dalagita nga nagaeskwela sa Camp Mystic sa guwa lang sang banwa sang Kyrrville sa Northweast sang San Antonio, Texas.
Ang paandam sa baha ginpaguwa samtang ang Guadalupe River nagsaka sa 26 feet sa wala pa isa ka oras, nga nag-anod sang mga mobile home, mga salakyan kag mga holiday cabin sa diin ang mga pumuluyo nagahinguyang sang Hulyo 4 nga katapusan sang semana, nga nagdungan sa Independence Day sang Amerika.
Ang State of Calamity gindeklarar man sa pila ka mga county lakip na ang Hill Country kag Concho Valley regions sa diin pila ka mga dalan ang gin-anod kag ang mga linya sang komunikasyon nadula.
Gintawag ni US President Donald Trump nga “shocking” kag “terrible” ang trahedya. Angut sini, nagpromisa ang White House nga magahatag sang dugang nga bulig sa mga apektado sang makahalalit nga baha sa estado.
Magapadayon man ang pagpangita sa mga biktima gamit ang mga helicopter, drone kag sakayan tubtub nga ma-account ang tanan nga nadula.
