Indi magnubo sa anum (6) ka tawo ang nareport nga napatay sa narumpag nga private landfill sa Binaliw, Cebu City samtang 32 ka iban pa ang nagapabilin nga missing.
Ginabanta 50 ka mga sanitation workers ang nalubong, sang narumpag ang basura gikan sa kataason nga ginabanta katumbas sa 20 ka panalgan sa pribado nga landfill nga ginapadalagan sang Prime Integrated Waste Solutions.
Sa karon, padayon ang operasyon sang mga otoridad, gamit ang mabug-at nga makinarya, lakip na ang mga backhoe, sa pagkutkot sang nalubong nga mga natabunan.
Suno sa Cebu rescuer nga si Jo Reyes, nagapadayon ang operasyon apang temporaryo nga gina-untat kun maghulag na ang landfill.
Ginkumpirmar ni Cebu City councilor Dave Tumulak, chairman sang city disaster council nga nagsaka na sa anum (6) ang kumpirmado nga napatay matapos narekober ang duha ka bangkay sang Sabado, samtang 32 naman ang missing sa karon.
Kalakip na ang mga administrative offices kag staff housing nga natabunan sang basura, madamo sang mga biktima ang ginapatihan nga yara didto.
Nahibaluan nga ang Binaliw Landfill nagaproseso sang ginabanta 1,000 ka tonelada sang basura kada adlaw kag nagaserbisyo sa syudad sang Cebu kag mga malapit nga komunidad.
Bukas ang Bombo Radyo Philippines sa bahin sang kompaniya apang tubtob subong wala pa ini sang may nahimo nga pahayag angot sa nasambit nga isyu.
