Naglab-ot na sa walo ang mga napatay sa pagkarumpag sang bukid sang basura sa Binaliw landfill sa Cebu City matapos narekober ang duha ka bangkay sa search and rescue operations.
Padayon ang pagpangita sa 28 pa ka mga indibidwal, samtang 38 ka mga personnel sang Philippine Army gikan sa 525th Engineering Battalion kag CBRN Troops ang nagabulig sa operasyon.
Suno kay Councilor Dave Tumulak, may yara sang structural beams nga nagabalabag sa lugar gani nagagamit sang nagakaigo nga kagamitan ang mga rescuers agud makuha ang obstruction.
Ginklaro man sini nga nagapabilin nga search and rescue mission ang nasambit nga operasyon kag wala pa ginakabig nga recovery.
Samtang, ginpanindugan naman ni Mayor Nestor Archival Sr nga dapat manabat ang DENR sa regulatory violations may kaangtanan sa landfill.
Ginhatagan niya pagtamod nga indi basta-basta nga siraduhan sang lokal nga panguluhan ang pasilidad bangud nag-issue na sang environmental clearance ang DENR.
Matandaan, narumpag ang landfill nga gina-operate sang Prime Integrated Waste Solutions Inc. (PIWS) sang Enero 8 nga ginkamatay sang mga mamumugon.
Dugang pa sang alkalde, katungdanan sang DENR nga magpanguna sa pag-imbestigar kag pagdesisyon sa operasyon sang pasilidad.
