MANILA-Ginpahayag ni Teodoro sa interview sa ANC nga ang China mismo nagapahayag sang suporta sa United Nations Convention on the Law of the Sea (UNCLOS) kag sa malinong nga pagsolbar sang mga indi paghangpanay sang mga pungsod, ilabi na sa katapos lang nga ASEAN Defense Ministers’ Meeting-Plus (ADMM-Plus) nga ginpatigayon sa Cebu.
Apang, ginpunto sang kalihim nga indi nagauyon ang ginapahayag nga panindugan sang Beijing sa iya aktuwal nga tikang bangud wala sini ginakilala ang 2016 arbitral ruling nga ginpagwa suno sa mga probisyon sang UNCLOS. Ini nga desisyon nagbalibad sa legal nga basehan sang malapad nga pag-angkon sang China sa mga katubigan sa South China Sea nga nagalapas sa mga katungdanan kag kinamatarong nga ginapatuman sang international maritime law.
Dugang pa diri, ginbalibaran man ni Teodoro ang mga akusasyon sang China nga ginpabudlayan sang Pilipinas ang pag-apil sini sa ADMM-Plus kag nga gin-gamit sang Manila ang iya katungdanan bilang host para sa personal nga interes.
Una na nga ginpakwestyon sang Beijing ang pagpadala sang imbitasyon kag ang pagdumala sang Pilipinas sa regional defense meeting, nga suno sa ila kulang ang tion nga nahatag agud makapreparar para sa aktibidad. Sa amo nga miting, defense attaché sang Chinese Embassy ang ginpadala sang China imbes nga ang ila Defense Minister Dong Jun.
Apang, ginpahayag ni Teodoro nga wala sang iban nga miembro sang Association of Southeast Asian Nations ukon ASEAN nga personal nga nagpaabot sa iya sang reklamo parte sa pagdumala sang Pilipinas sa pag-apil sang China. Gin-athag niya nga kon may yara man sang pagkabalaka, dapat ini ipabutyag mismo sang mga miembro sang ASEAN.
Ginpabug-atan man sang kalihim nga wala sang kinamatarong ang bisan ano nga pungsod nga maghambal sa ngalan sang mga miembro sang ASEAN parte sa ila kaugalingon nga mga proseso kag desisyon.
Bisan pa sang indi paghangpanay sang Pilipinas kag China, ginpahayag ni Teodoro nga may yara sang progreso sa praktikal nga kooperasyon sa depensa sang mga pungsod nga kabahin sang ASEAN kag sang ila mga dialogue partners.
Lakip sa iya ginpabutyag ang una nga ASEAN interoperability exercise nga ginhingalanan nga Trident Sword, nga nagatuyo sa pagpauswag sang kooperasyon sa humanitarian assistance kag disaster response. Ginhisgutan man niya ang una nga joint cooperative activity sa Subic nga ginpatigayon sa idalom sang Experts’ Working Group on Maritime Security, nga gina-co-lead sang Pilipinas kag Japan.
Ang ADMM-Plus amo ang regional defense platform nga nagatipon sa 10 ka miembro sang ASEAN kag walo ka dialogue partners nga nagalakip sa Australia, China, India, Japan, New Zealand, South Korea, Russia kag United States.
Sa pihak sang padayon nga tensyon sa West Philippine Sea, ginpabutyag sang Pilipinas nga kinahanglan magpabilin nga sentro ang pagtahod sa internasyonal nga layi, malinong nga pagsolbar sang mga away kag kooperasyon sang mga pungsod agud mapadayon ang seguridad kag kalinong sa rehiyon.
