Delayed importation sang bugas, ginabasol sa NFA council-GRECON
ROXAS CITY – Ginabasol sang Grains Retailers Confederation of the Philippines (GRECON) sa ulihi nga desisyon sang NFA council ang delayed nga importasyon sang bugas nga nangin rason sang kakulang sang suplay sang NFA rice sa mga merkado.
Sa exclusive interview sang Bombo Radyo Roxas kay anay Capiz board member kag GRECON president James Magbanua, ginpahayag sini nga daku ang partisipasyon sang council rason nga na-delayed ang pag-import sang bugas, bangud kinahanglan pa nga mag-agi sa ila ang pagdesisyon.
Suno pa kay Magbanua, isa sa mga nagtambong sa ginpatawag nga forum ni President Rodrigo Duterte kagab-i nga ginhatag na kay Department of Agriculture Secretary Manny Piñol ang pagdumala sa konseho para gilayon makadihon sang desisyon kag masolusyunan ang food shortage sa pungsod nga tuga sang kakulang sang suplay sang NFA rice.
Sa karon ang nakita nga solusyon ni Magbanua sa problema sa NFA rice ang madasig nga importasyon sang 250,000 metriko tonelada nga bugas, para mapun-an ang kakulangan sa buffer stock sang NFA.
