ROXAS CITY – Preparado na ang delegasyon sang Capiz para sa pagahiwaton nga Western Visayas Regional Athletics Association (WVRAA) 2024 sa Negros Occidental.
Sa interview sang Bombo Radyo kay Mr. Ronie Reteracion DepEd Capiz, Sports Coordinator, ginpahayag sini nga may yara sang 785 tanan nga mga delegasyon ang Capiz kung sa diin kalakip diri ang mga Coaches, Staffs and Officials.
Suno kay Reteracion, temprano pa nga nagbyahe ang mga atleta padulong sa Negros Occidental kung sa diin pagahiwaton sa syudad sang Bacolod ang pagpaindis-indis sang tanan nga mga delegasyon nga magasugod sa Mayo 2 tubtob 7.
Mahibaluan nga nagsugod ang ila training sadtong Abril 1, bilang pagpreparar sang ila tagsa ka mga hampang nga pagapasakupan.
Samtang, ginsiling sang nasambit nga Sports Coordinator nga wala sang representante ang probinsya sa patag sang wrestling bangud indi pa ini preparado.
Apang magluwas sa amu nga hampang present sa tanan nga event ang mga delegasyon sumugod sa elementarya, sekondarya kag college.
Sa nasambit nga aktibidad, may yara sang gin-alokar nga pondo para sa mga atleta kung sa diin magamit sang mga ini nga pagbakal sang ila tagsa ka mga kinahanglanon.
Matandaan nga nakabaton ang mga ini sang subsidy/allowance nagikan sa City Government.
