MAAYON, CAPIZ- Ginaalegar ginhold-up sang wala pa matumod nga mga indibidwal ang isa ka delivery rider sa Bypass Road, sa Sitio Agbanga, Barangay, Indayagan, Maayon, Capiz.
Ang nasambit nga rider amo si Jomar Boiser, 26-anyos, kag residente sang Poblacion Campo, President Roxas, Capiz.
Sa interview sang Bombo Radyo kay Police Captain Danny Lauron, Hepe sang Maayon Municipal Police Station, iya ginpahayag nga personal nga nagpadulong sa ila nga talatapan ang amo nga rider agud i-report ang natabo.
Suno kay Lauron, base sa ila nga pagpangusisa, ginsiling sang rider nga wala niya madiparahan ang nagasunod sa iya nga nagpakuno-kuno patudlo sang dalan padulong sa Barangay Tuburan, apang hinali nalang ini nga nagpangtaya sang wala matumod nga armas-luthang kag nagdeklarar sang hold-up.
Natigayon nga nataban sa rider ang P15, 000 kag isa ka unit sang cellphone.
Sandig sa panaysayon sang rider, duha ka mga indibidwal nga nakasuksok sa itom nga jacket, itom nga helmet kag may tabon sa mga nawong ang ginapahayag nagpang-hold up sa iya.
Sa subong, nagapadayon ang imbestigasyon sang Maayon Municipal Police Station angut sa nasambit nga insidente.
Interviewed by Bombo Sunnie Mae Constantino Batencila
