ROXAS CITY – Nagpatigayon sang random water sampling sa sapa kun sa diin naga-ilig ang mga water waste sang sanitary landfill sa Barangay San Jose, Roxas City ang mga katapo sang Department of Natural Resources (DENR)-Environmental Management Bureau (EMB) Region 6.
Suno kay Chief Solid Waste Management Division Engr. Marlon Bonite nga naga duda sila kun kontaminado ang tubig sa sapa sang kun sa diin naga-ilig ang water waste sang sanitary landfill rason nga nagkuha sila sang mga samples.
Nagkuha sang apat ka mga samples ang EMB nga ginalakipan sang 50 meters upstream, 50 meters downstream, point of discharge kag mixing point.
Ang mga nakuha nga water samples ang gindala sa syudad sang Iloilo agud gamiton para sa laboratory analysis.
Pinaagi sini mahibaluan kun kuntaminado ang nasambit nga sapa sang mga water waste nga nagahalin sa sanitary landfill.
Mahibaluan kun ano ang mangin resulta sang laboratory analysis sa apat ka mga water samples matapos ang lima ka adlaw.
Ginpanindugan ni Bonite nga indi basehan ang mga batud nga isda kag paka nga nagakabuhi sa sapa kag indi mangin ‘brownish’ ang duag sang tubig kun naga-agi ini sa water treatment facility.
Natukiban ni Bonite sa iya pagbisita sa lugar nga indi ini makabig nga sanitary landfill kundi ini ang open dumpsite bangud madamo ang mga kakulangan nga pasilidad sa sulod.
