Gin-apruhan sang Department of Budget and Management (DBM) sa idalom sang pagpanguna ni Secretary Amenah Pangandaman ang 16,000 ka mga bag-o nga teaching positions sa mga pampubliko nga eskwelahan para sa School Year (SY) 2025-2026, bilang sabat sa direktiba ni Presidente Ferdinand Marcos Jr. nga pabaskugon ang sektor sang edukasyon.
Ang 16,000 ka bag-o nga posisyon ang kabahin sang first tranche sang target nga 20,000 ka teaching positions para sa sini nga tuig.
Sa pihak nga bahin sa 15,343 ka bag-o nga posisyon amo ang Teacher I (Salary Grade 11).
Ang mga teaching posts para sa Senior High School igabutang sa division level para sa mas flexible nga deployment, suno sa polisiya nga una nga ginpaguwa sang DBM sang 2016.
Suno kay Secretary Pangandaman, ang ini nga tikang ang suporta sa Department of Education (DepEd) agud mapabaskog ang workforce sa Kindergarten, Elementary, Junior High School, Senior High School, kag Alternative Learning System (ALS).
Ginabulubanta nga magalab-ot sa P4.194 bilyones ang pondo nga ginpain para sa mga bag-o nga posisyon nga magahalin sa built-in appropriations sang DepEd sa idalum sang 2025 General Appropriations Act.
Sa karon nga SY 2024–2025, ginreport sang DepEd nga kapin sa 27.012 milyones ka mga estudyante ang naka-enrol sa elementarya kag hayskul sa bug-os nga pungsod, lakip na ang mga yara sa Alternative Learning System (ALS).
