Hugot nga ipatuman sang Department of Education (DepEd) Region VI Western Visayas ang “no collection policy” para sa Graduation Rites 2026.
Sa interview sang Bombo Radyo kay Mr. Hernani Escullar Jr., Regional Information Officer sang Department of Education Region VI, iya ginpahayag nga dapat gamiton sang mga buluthuan ang ila Maintenance and Other Operating Expenses (MOOE) para sa graduation expenses, samtang ang anuman nga bulig ang igahatag sang mga ginikanan dapat boluntaryo kag indi mandatory.
Suno kay Escullar, ang Parent-Teacher Associations (PTAs) ang mahimo nga magpatigayon sang fundraising, apang indi ini dapat himuon nga obligasyon.
Dugang pa niya nga dapat ikonsiderar ang safety kag comfort sang mga estudyante sa pagpatuman sang programa, kasubong sang paggamit sang properly ventilated covered courts kag paglikaw sa pinakamainit nga oras sang adlaw.
Pahayag pa niya, dapat ang tanan nga mga awards kag recognitions dapat ihanda lima ka adlaw antes ang seremonya agud masiguro ang nagakaigo nga koordinasyon.
Nahibaluan nga nagpaguwa ang DepEd sang Memorandum No. 015, series of 2026, agud masiguro nga ang tanan nga estudyante makatambong sa mga seremonya nga wala sang financial burden.
Nagpasalig man ang natungdan sa mga ginikanan kag estudyante nga apisar simple lang ang patigayunon nga Graduation Rites magapabilin ini nga makahulugan bilang tanda sang tinimakasan sang mga manugtapos subong nga tuig.
