ROXAS CITY – “All Set” na ang pagbukas sang klase para sa School Year 2020-2021 sang Department of Education subong nga COVID-19 Pandemic sa adlaw sang Lunes, Oktubre 5.
Sa interview sang Bombo Radyo kay Dr. Leah Belleza, Information Officer sang DOH-6 nga handa na ang tanan nga mga manunudlo kag estudyante sa pagsugod sang klase subong nga pandemya sa mga pampubliko nga mga buluthuan.
Ginpahayag ni Belleza nga nagalab-ot sa 1,754,067 ka mga estudyante gikan sa kindergarten tubtob sa Senior High Schools ang nakapa-enroll na sa nagkalain-lain nga mga buluthuan.
Apang, gin-athag sini nga padayon sa gihapon sila sa pagbaton sang mga estudyante nga luyag magpa-enroll.
Kalakip sa mga Learning Delivery Modalities amo ang Modular Learning, Online Learning, TV Based ukon radio based instruction kag blended learning.
Nagpanugyan naman si Belleza sa mga ginikanan nga suportahan man nila ang ila mga kabataan sa pagtuon subong nga pandemya agud nga hatagan man sang importansya sang mga ini ang ginhatag sa ila nga mga modules.
Sa pihak sini, ginpasiguro ni Belleza nga mahimo sa gihapon nga makapatigayon sang online flag ceremony kapareho sang kinaandan na nga ginahimo sadto sang mga estudyante sa tagsa ka Lunes nga adlaw ukon antes magsugod ang klase.
Matandaan nga nagpatigayon man ang DepEd sang mga simulation exercises kag orientation sa pagbukas sang klase kaupod ang mga manunudlo kag ginikan agud nga ipaintiendi sa ila ang bag-o nga sistema sa pagtuon sang mga estudyante.
