ROXAS CITY, CAPIZ- Nagapadayon ang pakig-koordinar sang Department of Education Capiz Division sa mga otoridad agud masiguro ang seguridad sang mga estudyante kag mga manunudlo sa tagsa ka mga buluthuan sa probinsya sang Capiz.
Sa interview sang Bombo Radyo kay Ms. Yzarda Claudette Ballera, Division Information Officer sang Department of Education Capiz Division, iya ginpahayag nga pamaagi sa Child Protection Policy, nagadihon sang mga contingency plan ang mga otoridad.
Dugang pa sini, padayon nga nagakoordinar ang ila nga talatapan sa mga kapulisan, lokal government units kag pila pa ka mga ahensya nga nagabulig sa pagsiguro sang seguridad sa tagsa ka mga buluthuan.
Nahibaluan nga sang damlag lang, may pila ka mga serye sang krimen ang nagakahinabo sa iban nga rehiyon sa sulod mismo sang buluthuan rason nga ginapahugot gid ang pagmonitor kag koordinasyon sang mga manunudlo sa mga otoridad.
Nagapadayon naman suno sa iya ang mga pagbantay sang mga kapulisan sa tagsa ka mga buluthuan sa probinsya.
Mensahe naman sini sa tagsa-tagsa nga ginahimo sng ila nga talatapan ang tanan agud masiguro ang seguridad sang tagsa ka mga estudyante kag manundulo sa buluthuan.
Interviewed by Bombo Jessa Mae Siman De Los Santos
