ROXAS CITY – Ginkakibot kag ginkasubo sang Department of Education (DepEd) Capiz, ang nagtuhaw nga pahayag nga ginahimo training ground sang mga grupo nga Communist Party of the Philippines – New People’s Army (CPP-NPA) ang Putian National High School sa Cuartero Capiz.
Sa interview sang Bombo Radyo kay Dr. Miguel Mac D. Aposin – CESO V, Schools Division Superintendent sang Division of Capiz, ginpahayag sini nga sang nabaton kag nabatian ang amu nga pahayag gilayon niya nga gintawagan ang school head sang amu nga buluthuan agud hibaluon kun anu ang matuod subong man ang sitwasyon sang mga estudyante.
Suno diri, nagcoordinate man sila sa Public School District Supervisor kag Punong Barangay Nemesio Fuyunan nga padulungan ang amu nga eskwelahan agud magpatigayon sang imbestigsyon.
Ginpahayag man ni Aposin nga sa pihak sini, ginasiguro kag ginaprayoridad nila sa karun ang seguridad sang mga estudyante kun sa diin magahatag sang kulba ilabi na sa mga ginikanan.
Matandaan sa ginpatigayon nga hearing sang Senate panel sa public order and dangerous drugs, nagpanguna sa listahan ang Putian National High School sa 23 ka mga buluthuan nga gintumod ni PNP Directorate for Operations Colonel Randy Arceo nga may nagakahinabo nga recruitment activity sang rebelde nga grupo.
