ROXAS CITY -Dako ang pagsalig sang pamunuan sang Department of Education Capiz-Schools Division ukon DepED Capiz nga malab-ot sini ang numero sang projected enrollees sa pagbukas liwat sang klase sa maabot nga bulan sang Agosto.
Ini ang ginpahayag ni Capiz Schools Division Superintendent Dr. Salvador Ochavo sang mainterview sang Bombo Radyo.
Ginpahayag ni Ochavo nga yara pa lamang sa 61 porsyento ang natigayon nga maka-enroll sa nagkalain-lain nga mga buluthuan sa probinsiya.
Apang, ginalauman pa sini nga malab-ot sang DepEd Capiz ang “projected number of enrollees” bangud mas ginpalawig pa ang enrolment tubtob sa Hulyo 15.
Samtang ginpasalig naman sini nga preparado na ang DepED Capiz sa tion nga magdamo ang mga estudyante.
Suno kay Ochavo nga bastante man ang mga hulot kag mga manunudlo sa tion nga magdamo ang mga estudyante nga mapa-enroll.
Mahibaluan nga yara pa gid lamang sa 100,950 ang numero sang mga estudyante ang nakapa-enroll samtang ginalauman naman sang talatapan nga malab-ot ang 146,901 nga projected enrollees antes magbukas ang klase.
