ROXAS CITY, CAPIZ- Preparado na ang talatapan sang Department of Education Capiz sa mangin epekto sang Bagyo Uwan.
Sa interview sang Bombo Radyo kay Ms. Glenda Marie Botin, Project Development Officer II sang Department of Education Capiz, iya ginpahayag nga nakapreparar na ang 471 tanan ka mga buluthuan sa bilog nga probinsya sang Capiz para sa nasambit nga bagyo.
Suno kay Botin, na-secure na ang tanan nga mga pagkabutang sa tagsa ka mga hulot agud nga masigurado ang safety sang mga dokumento sa tion nga may mag-evacuate.
Pahayag nya, nakigkoordinar na ang ila nga talatapan sa iban pa nga mga natungdan nga ahensya para sa mga safety measures kag dugang nga tikang may kaangtanan sa evacuations.
Samtang, ginpakigbahin man ni Botin nga nagpreparar man ang ila nga talatapan sang mga modules para sa mga estudyante agud masiguro nga nagapadayon ang edukasyon sa pihak sang mga class suspensions, apang suno sa iya, kun manageable lang ang sitwasyon, mahimo nga paga-ubrahon sang estudyante ang mga school tasks, apang kun indi, ginkonsidera man sang ila nga talatapan.
Nagpahanumdom naman ang natungdan sa publiko nga maghalong gid kag magpabilin nga aligmat para sa posible nga epekto sang Bagyo Uwan sa probinsya.
Interviewed by Bombo Sunnie Mae Constantino Batencila
