Gin-ako ni Education Secretary Sonny Angara nga may nangin kakulangan sa implementasyon sang Senior High School (SHS) curriculum sa idalom sang K to 12 program, apang ginsiling sini nga ang Kongreso lang ang may gahom nga magdesisyon kun ipadayon pa ini ukon indi.
Kasunod ini sang ginaduso nga layi ni Senate President Pro Tempore Jinggoy Estrada nga kakason ang SHS, bangud sa kapaslawan sini nga makuha ang katuyuan nga maka-prodyus sang mga job-ready nga graduates ang programa.
12 ka tuig matapos ginpapasar ang Republic Act No. 10533 o Enhanced Basic Education Act of 2013.
Sa idalom sang Senate Bill No. 3001 ni Estrada, ginasiling diri nga ibalik sa kindergarten, anom ka tuig sa elementary, kag apat ka tuig sa high school kun sa diin wala na ang SHS.
Samtang, suno kay Angara, umpisa sa School Year 2025–2026, magapatigayon na ang Department of Education (DepEd) sang pilot implementation sang bag-o nga SHS curriculum sa 841 paaralan.
Bangud suno sa iya, “hindi maganda” ang nangin implementasyon sang SHS sa nakaligad nga dekada bangud sa sobra ka damo sang mga asignatura ukon subjects kag kakulang sang kahilwayan sang mga estudyante sa pagpili sang tagsa nila ka mga subject.
Una na diri, ginhatagan pagtamod ni Senador Sherwin Gatchalian nga kinahanglan tumanon sang K to 12 program ang orihinal sini nga katuyuan nga panubuon ang college education pamaagi sa pagbuhin sa mga ginaliwat-liwat nga subjects sa kolehiyo.
