Dakop sa akto ang walo tanan ka mga tripulante matapos nagapatigayon sang iligal nga pagpangisda sa kalalawran nga sakop sang Brgy. Culasi, Roxas City.
Ang mga nadakpan amo sanday, alyas “Mil” 46-anyos, boat captain, alyas “Boy” 50-anyos, alyas “Jan” 23-anyos, alyas “Renan’ 28-anyos, alyas “Jef”36-anyos, alyas “Regie” 37-anyos, alyas “Giov” 25-anyos, alyas ‘ Jun” 25-anyos kag mga residente sa nagkalain-lain nga barangay.
Sa impormasyon nga nakuha sang Bombo Radyo, nagikan sa Roxas Component City Police Station, ginpahayag nga natigayon nga madakpan ang mga indibidwal pinaagi sa operasyon kaupod ang Bantay Dagat kag Task Force Bantay Dagat sang syudad.
Narekober sang mga otoridad ang fishing boat, makina, mga gamit sa pagpangisda kag kapin 800 ka kilo sang isda nga ginabanta nagabalor sa kapin P1.7 milyon.
Sa subong, yara na ang tanan nga nakumpiska nga kagamitan sa kustodiya sang City Fisheries/Agriculture Office para sa nagkaigo nga disposisyon.
Padayon naman ang kampanya sang kapulisan kag lokal nga gobyerno kontra sa ilegal nga pagangisda agud maprotektahan ang katubigan kag kabuhi sang mga lehitimo nga mangigisda sa Roxas City.
