Ginaprayoridad sang Department of Education (DepEd) ang pagkuha sa mga nagabalik nga Overseas Filipino Worker (OFW) nga mga maestro kag maestra nga luyag magtudlo liwat sa Pilipinas.
Suno kay Education Secretary Sonny Angara, ang amu nga tikang amu ang pagsunod sa direktiba ni Pangulong Ferdinand “Bongbong” Marcos Jr. agud mapun-an ang madamo nga bakante nga posisyon sa pagtudlo.
Mandu sang Presidente nga i-prioritize gid ang returning OFWs sa mga teaching positions bangud may daku kita nga hiring subong suno kay Angara.
Gindugang pa sini nga luwas sa paghatag prayoridad, pagapalaparon man ang mga benepisyo para sa ila bilang kabahin sang pagsabat sa kinahanglanon sang workforce kag sa ginapatigayon nga repatriation sang mga Pilipino halin sa Middle East.
Ginlunsyar man ang programa nga “Sa ‘Pinas, Ikaw ang Ma’am kag Sir” (SPIMS) nga ginadisenyo agud buligan ang mga OFW teachers nga makabalik sa lokal nga sistema sang edukasyon, lakip na ang paghatag sang training para sa mga wala nakapauli sa pungsod sa sulod sang masobra isa ka tuig.
Dugang pa ni Angara, mahimo man nga makabaton sang mas madasig nga promosyon ang mga nagabalik nga manunudlo sa ila trabaho sa sulod sang DepEd.
