DepEd- Region VI magapatigayon sang regional kick off program para sa brigada eskwela 2022 sa agosto 8

ROXAS CITY – Magapatigayon sang Regional Kick Off Program nga may tema nga Brigada Eskwela 2022: Tugon sa Hamon ng Ligtas na Balik-Aral ang Department of Education (DEPED) sa syudad sang Roxas sa Agosto 8, 2022.

Ini ang ginkumpirmar ni Dr. Miguel Mac Aposin, Capiz School Division Superintendent sang mainterview sang Bombo Radyo.

Suno diri, on-going ang preparasyon para sa nasambit nga hilikuton kun sa diin pagatambongan ini sang 21 ka mga school division sa bug-os nga Rehiyon VI kag pagasuguran sang motorcade kag pagahiwaton ang aktibidad sa Capiz Villareal Stadium, Roxas City.

Ang Brigada Eskwela ang kinaangdan nga nga aktibidad sa isa ka buluthoan agud preparahan ang pagbukas sang klase kag gina-promote ang bayanihan ukon volunteerism.

Gina-imbitahan man ni Aposin ang mga stakeholders, opisyals kag ginikanan nga magtambong sa nasambit nga hilikuton ilabi na subong nga liwat nga magabukas ang face to face classes.

Hugot man nga ginapatuman sang mga buluthoan ang mga health protocols agud malikawan ang pagnilapta sang COVID-19 sa lugar.

Matandaan nga nagsugod na sa bug-os nga pungsod ang Brigada Eskwela National Kick Off kahapon nga adlaw Agosto 1, kun sa diin ginpangunahan ini ni Vice President kag DepEd Secretary Sara Duterte sa Imus, Cavite.