ROXAS CITY – Nakahanda na ang Department of Education (DepEd) Roxas City Division para sa nagahilapit nga pagbukas sang klase nga gintalana sa Oktubre 5, 2020.
Ini ang ginpahayag ni Chief Education Supervisor Dr. Marvic S. Martirez sang mainterview sang Bombo Radyo.
Ginpahayag sini nga ginahimo nila ang tanan agud mapreparahan sang maayo ang ‘new normal’ education.
Mahibaluan nga ang tagsa ka eskwelahan ang may yara sang Basic Education-Learning Continuity Plan.
Bilang preparasyon, ginhanas man ang mga manunudlo pinaagi sa trainings kag mga webinars, mga ginikanan kag mga estudyante nga nagpaidalom sa dry-run.
May yara man sang magkatuhay nga mga learning modalities suno kay Martirez nga mahimo mapilian sang mga ginikanan kag estudyante.
May yara suno diri sang pinaagi sa radio ukon TV, online kag modular.
Mahimo man ang ‘blended’ learning para sa mga luyag mag-agi sa proseso sang magkatuhay nga mga learning modalities.
Samtang, indi naman pabor ang ahensiya sa panawagan sang iban nga ginikanan kag estudyante nga ‘academic freeze’ bangud nagapati sila nga indi mahimo mauntat ang edukasyon.
Mahibaluan nga naglawig ang pagpaiway sang klase bangud sang ginapangatubang sa karon nga pandemiya sang Pilipinas tuga sang coronavirus disease (COVID-19) kun sa diin padayon pa nga nagatimbuok ang napapagkit nga mga kaso sang amo nga balatian.
