ROXAS CITY – Imbitado sa isa ka conference sa Texas, USA ang isa ka Capizeño nga nagpatigayon sang research sa Asthma Weed ukon mas kilala sa Tawa tawa nga ginapatihan bulong sa balatian nga diabetes.
Si Dr. Reynand Dumala-on, sang Barangay Matinabus, Sigma, Capiz, nagatudlo sang Physics sa Sir Herbert Leon Academy, Milton Keynes, England nagpatigayon sang research sa posible bulong nga makapanubo sang blood sugar sang isa ka indibidwal nga nagasuprer sang balatian nga diabetes.
Nagserbe nga instrumento sang iya pagtuon ang white mice bangud wala nagalayo ang metabolismo sini sa mga tawo.
Nagguwa sa pagtuon ni Dr. Dumalaon nga epektibo ang dahon sang tawa tawa bangud may yara ini sang anti oxidants nga nagapanubo sang blood sugar.
Bangud sa maayo nga epekto sang tawa tawa leaves, gin share sini ang iya research sa mga nakilala nga mga teachers, medical staff kag scientists sa Estados Unidos sa diin una siya nagtudlo sa isa ka eskwelahan sa South Carolina.
Bangud nangin interesado ang isa ka institution sa research natuhoy sa diabetis, gin-imbitahan si Dr. Dumala-on sang Innovinc International nga magtambong sa 2020 Nursing and Healthcare Conference sa Abril 16-17, 2020 sa Houston, Texas, USA.
Sa nasambit nga kunperensiya, makaangkon sang 20 minutos nga presentation si Dr. Dumala-on angut sa iya nangin research.
Kalakip sa magatambong sa amo nga kahiwatan ang mga healthcare professionals, pharmacists, phamaceutical kag medical companies, scientist kag iban pa.
Samtang gin-ako ni Dr. Dumala-on nga isa sa nagtulod sa iya para magpangita sang pamaagi agud makaangkon sang bulong para sa pagpanubo sang blood sugar amo ang kaugalingon nga iloy nga nagasuprer sang diabetes.
