Ginabantayan sang Department of Information and Communications Technology (DICT) ang lapnagon nga global IT system outage nga nagaapekto sa mga negosyo sa bug-os nga kalibutan.
Suno kay DICT Assistant Secretary and spokesperson Renato Paraiso, nagapatigayon sa karon sang hugot nga monitoring ang ila nga Cybersecurity Bureau kag National Computer Emergency Response Team sa nasambit nga insidente.
Gin-athag man sini nga indi bangud sa hacking ukon cyberattack ang natabo kundi ‘faulty updates’.
Nagapati naman ini nga gilayon nga masolbar ang amo nga problema.
Samtang, nakabalik na ang pila ka online services sang pila ka bangko sa pungsod nga naapektuhan sang nasambit nga global outages. Matandaan nga madamo sang mga bangko, flights kag pila ka negosyo ang naapektuhan sang amo nga outage matapos nga mag-angkon sang problema ang sistema sang cybersecurity company na CrowdStrike.
