Ginmanduan sang Department of the Interior and Local Government (DILG) ang mga local government units nga sakop sang Permanent Danger Zone (PDZ) sang Bulkan Kanlaon nga magpatigayon sang gilayon nga evacuations matapos nga naglupok ang bulkan sa Isla sang Negros.
Dapat nga magpabilin nga evacuated ang tanan nga residente sa sulod sang PDZ kag dapat naka-heightened alert ang mga residente nga yara sa sulod sang anum ka kilometro.
Ginmanduan man ang mga lokal nga panguluhan nga pabaskugon ang pagbantay sa mga lahar kag pagbaha, kag padayunon ang komunikasyon sa risgo sa malayo nga mga sitio.
Nakaeksperyensya sang moderately explosive eruption ang Kanlaon nga naglawig sang duha ka minutos kag nagbuga sang plume nga nagtaas sang 2,000 metros.
Nagapabilin nga epektibo ang Alert Level 2 kag hugot nga ginadumilian ang pagsulod sa sulod sang apat ka kilometro nga radius.
Nagpatigayon man sang gilayon nga pagsinapol ang mga disaster council, pag-activate sang mga emergency operations, kag pag-validate sang mga evacuation centers subong man ang pag-preposition sang mga relief supplies.
Kadungan sini, ginpahanumdom sang DILG kag sang Department of Health ang mga tawo nga sundon ang health precautions sa tion sang ashfall, ilabi na sa mga kabataan, tigulang, nagabusong, kag may pre-existing conditions.
