Ginpalab-ot ni Dingdong Avanzado ang iya tinagipusuon nga pagpakig-unong sa pagtaliwan sang OPM icon nga si Hajji Alejandro matapos ang pagpakigbato sa sakit nga kanser.
Sa iya mensahe, ginpahanumdom ni Avanzado ang ila madalom nga pag-abyanay nga indi lamang nagalibot sa musika kundi pati man sa sports, kag pag-ambitanay sang kabuhi.
Suno kay Avanzado, nangin manunudlo, abyan, kag inspirasyon sa iya si Alejandro, kag ginpasalamatan sini ang mga leksyon sa kabuhi nga iya ginpaambit. Nagpalab-ot man ini sang iya pagpakig-unong sa pamilya ni Hajji, lakip sanday Rachel, Barni, Ali, kag ang bug-os nga Alejandro clan.
Si Hajji Alejandro isa ka kilala nga haligi sang Original Pilipino Music kag nagbilin sang makahulugan nga palanublion sa industriya sa Musika sang pungsod.
