ROXAS CITY – Partially burned ang doctors quarters nga nahamtang sa 2nd floor sang Tapaz District Hospital matapos ang nagluntad nga sunog kaina sang aga, Disyembre 23, 2023 Barangay Switch, Tapaz, Capiz.
Sa interview sang Bombo Radyo kay Fire Officer 2 Elmer Acolentaba, Public Information Officer sang Bureau of Fire Protection Tapaz, samtang nagapatigayon sang aktibidad nakabaton sila sang impormasyon nga may sunog sa nasambit nga ospital.
Gilayon nga nagresponde ang BFP-Tapaz sa diin sa pag-abot sa lugar, naka-evacuate na ang mga pasyente kag personnel sang ospital kag amat-amat na napalong ang kalayu.
Sandig sa inisyal nga imbestigasyon, samtang nagapanglakaton ang bantay sang isa ka pasyente ginapahayag nalabayan sini kag nakit-an nga may naga-guwa nga asu sa doctors quarters.
Madasig ini nagpangayo sang bulig kag ginbululigan nga mapalong gamit ang fire extinguisher.
Masuwerte naman nga wala sa sulod sang kwarto ang indi na paghingadlan nga resident doctor bangud naglibot ini sa mga pasyente.
Ginabulubanta nga yara sa mas o menus P100,000 ang nangin halit sang sunog kalakip na diri ang gadgets kag personal nga kagamitan sang doctor.
Ginasuspetsahan nga faulty electrical wiring ang ginsuguran sang sunog.
Sa karon, nagapadayon pa ang imbestigasyon sang BFP-Tapaz sa nasambit nga insidente.
