Padayon ang pagpanghanda sang Department of Energy (DOE) sa epekto sang mas mabaskog nga El Niño kag sa posible nga epekto sini sa supply sang kuryente sa Pilipinas.
Suno kay DOE Secretary Sharon Garin, ginapatigayon sang ahensya ang nagkalain-lain nga tikang paagi sa Task Force on Energy Resiliency agud masiguro ang seguridad sang supply sang enerhiya sa tunga sang posible nga paglala sang El Niño.
Lakip sa mga tikang sang DOE ang pagpalig-on sang energy-saving measures kag ang pagpaandar sang Interruptible Load Program (ILP), lakip ang pagpanghanda sang mga generator set, dugang nga battery storage systems kag power barges sa Visayas.
Ginpahayag ni Garin nga bisan nagapabilin nga stable ang supply sang kuryente sa Visayas, nagnubo sang 60% ang kapasidad sang hydropower kag 20% naman sa solar energy, rason nga padayon nga ginabantayan sang ahensya ang kahimtangan sang supply sang kuryente.
