Ginpatpat sang Department of Health – Capiz ang mga sakit nga posible maangkon sa karon nga tuman ka init sang tiyempo bangud sa summer season.
Sa interview sang Bombo Radyo kay Mr. Joeffrey Espiritu, Development Management Officer IV kag tagpamaba sang DOH-Capiz, ginpahayag sini nga bangud nagsugod na ang tag-ilinit sa pungsod, posible nga maguwa man ang mga sakit nga ginatawag ‘6S kag 1H.’
Ini nga mga sakit ang mga masunod:
S-kin diseases
S-ore eyes
S-ipon at ubo
S-uka at pagdudumi (paghigko)
S-akmal – (animal bite)
S-akuna at digrasya
H-eat Stroke
Sa bahin sang skin diseases, may yara sang nagkalain-lain nga balatian ang mabatyagan kaangay sang sunborn, bungang araw, habas kag uyapos, panugyan sang DOH nga likawan nga palhitan sang bisan ano nga sahi sang lana ang ‘open wound’ agud malayo sa impeksyon.
Ginapahanumdom man ang publiko nga indi magbulad sa init sang adlaw ilabi na sumugod alas-10 sa aga tubtob alas-3 sa hapon, bangud ini nga inoras ang makatuga sang sakit sa panit, kag importante suno diri ang pag-apply sang lotion nga may sun protection.
Likawan man ang pagsuksok sang tuman ka pikit nga bayo, kag kun mahimo magsuksok sang mga mahan-han nga ‘light colors’ nga panapton.
Importante man nga mag-inom sang walo ka baso sang tubig ukon masobra pa, sa isa ka adlaw, masami nga mag-hugas sang kamot antes kag pagkatapos magkaon ukon maghampang sang mga hinuptan nga kasapatan.
Indi magmaneho sang salakyan kun nakainom sang makahulubog nga ilimnon.
Nagalaum ang ahensya nga sarang ma-enjoy ang summer nga malayo sa balatian.
