ROXAS CITY – Padayon ang pagmonitor sang DOH Capiz sa mga indibidwal nga nagpositibo sa Covid-19 sa probinsya sang Capiz.
Ini ang ginpahayag ni Mr. Jeoffrey Espiritu, Development Management Officer IV kag tagpamaba sang Department of Health (DOH)- Capiz sang ma-interview sang bombo radyo.
Suno diri, sa ila ulihi nga datos sining Hulyo 29 nagdangat na sa 12, 656 ang kabug-usan nga kaso sang Covid sa probinsya kun sa diin 524 ang total death, kag 12, 054 naman ang nakarekober.
Sa karon, 78 na ang aktibo nga kaso apang kalabanan diri ang asymptomatic kag nagapaayo sa ila puluy-an, samtang mild lamang ang nabatyagan sang mga symptomatic.
Sa pihak nga bahin, ginakabig ni Espiritu nga makaalarma ang monkeypox bangud ini man ang labing una nga nakasulod ang nasambit nga balatian sa pungsod kag madasig pa ini maglaton.
Mahibaluan nga nagpositibo ang 39- anyos nga lalaki sa monkeypox nga gikan sa iban nga pungsod kag nagpuli lamang diri sa Pilipinas, apang suno diri maayo na ang kahimtangan sang biktima sang virus kag padayon nga nagapaayo.
Dugang pa ni Espiritu, igalakip nila sa ila pakighinun-anon sa tagsa ka kabanwahanan sa ila public health forum ang isyu sa monkeypox agud mapalapta sa pumuluyo kun ano ini kag kun paano malikawan.
Luyag sini ipalab-ot sa pumuluyo sang probinsya ang pagpasalamat sa pagsuporta sa ila mga lihok agud matapna kag malikawan ang mga makahalalit nga balatian kalakip na ang covid, dengue kag monkeypox, kag ginapanugyan sini nga sundon ang mga ginapatuman sang gobyerno ilabi na ang pagsunod sa minimum health protocols.
