Ginpahayag sang tagpamaba sang Department of Health (DOH) – Capiz nga wala pa sang operational guidelines ang ila nga talatapan nga magasugod sa pagpabakuna sa mga kabataan nga naga-edad 12 tubtob 17-anyos sa probinstya.
Ini ang ginkumpirmar ni Mr. Joeffrey Espiritu, public information officer sang DOH-Capiz sang mainterview sang Bombo Radyo.
Suno diri, apisar nga ginpahanugutan na sang World Health Organization (WHO) ang pagpabakuna sa nasambit nga age group, apang base sa alokasyon sang COVID-19 vaccine, iga-prayoridad ang mga 18-anyos pataas nga malakip sa sub-category sang A1 tubtob A4.
Samtang, ginapaprepar man ang mga LGUs sa pagpanglista sang mga pangalan sang mga kabataan may kaangtanan sini agud sa pag-abot sang operational guidelines, nakahanda na ang pagpabakuna sa mga kabataan.
Nahibaluan nga Moderna kag Pfizer vaccine ang ginarekomendar sang WHO nga gamiton para sa mga nasambit nga age group.
Sa pihak nga bahin, ginkumpirmar man ni Espiritu nga may yara sang mga sample nga pasyente ang ginhatagan sang magkaiba nga COVID-19 vaccine sa ila second dose kag padayon ini nga ginamonitor ang iya sitwasyon.
Sa karon, sandig sa pinakabag-o nga datos sang Capiz PHO, 19.51% ukon 106,259 ka mga indibidwal sa Capiz ang fully vaccinated na.
