Nagpaandam ang Department of Health (DOH) sa publiko nga tinluan ang mga lugar nga naipunan sang tubig kag padayon nga magpa-konsulta sang timprano kun may sintomas sang dengue.
Partikular ang mga rehiyon ga apektado sang mga bagyong Kristine, Leon, Marce, Nika, Ofel kag Pepito.
Matapos ang asud-asod nga bagyo, posible nga mas madamo ang mga nabilin nga mga lugar nga may tubig nga masami nga ginapugaran sang mga lamok nga nagadala sang dengue virus.
Suno sa DOH, sa nakaligad nga anom nga semana, wala sang nabalita nga pagtaas sa mga bag-o nga kaso sang dengue sa mga rehiyon apang padayon naman ang pagkuha sang datos kag ginakonsidera nga may mga dugang pa sa mga palaabuton nga semana.
Ginapanan-aw man ang mga datos nga konektado sa mga epekto sang bagyo nga posible nga indi pa nabalhag.
Liwat nga ginapanugyanan sang DOH nga padayon nga magtinlo kag siguraduhon nga wala sang lamok sa palibot kag kun makabatyag sang sintomas sang dengue, magpakonsulta gilayon sa doktor ukon sa mga health center.
