ROXAS CITY – Kadungan sang Coronavirus Disease ukon COVID-19 Pandemic magapatigayon naman ang Department of Health sang nationwide measles, rubella kag polio supplemental immunization campaign sumugod sa Oktubre 26, 2020.
Ini ang ginpahayag ni Mr. Joeffry Espiritu, Development Management Office IV sang DOH sang mainterview sang Bombo Radyo.
Suno kay Espiritu sa idalum ini sang Nationwide Measles Rubella- Oral Polio Vaccine Supplemental Immunization Activity kun sa diin ang mga naga-edad sang 9-59 months ang sarang nga mabakunahan sang measles-rubella vaccine.
Samtang, pag-abot naman sa 0-59 months naman ang hatagan sang oral polio vaccine.
Ginpahayag sini nga ginhimo ini sang ahensya agud nga malikawan ang pagsaka sang numero sang kaso sang measles sa pungsod.
Libre ini nga bakuna para sa mga kabataan sa magkatuhay nga mga health centers ukon ospital.
Ginpasiguro man ni Espiritu nga luwas ini nga gamiton sang tagsa ka mga kabataan.
Samtang, nagpanugyan naman ini sa mga ginikanan nga indi magpangduha-duha nga pabakunahan ang ila mga kabataan agud mahilway man batuk sa nasambit nga balatian.
