Nagpasalig ang Department of Justice (DOJ) nga iga-review sini sang maayo ang request sang kampo ni dismissed Bamban, Tarlac Mayor Alice Guo nga ibasura ang iya ginapangatubang nga kaso nga human trafficking.

Suno kay Justice Undersecretary Raul Vasquez, himuon sang panel sang korte ang mahinalungon nga pag-review apisar nga pila ka beses naman nga nahatagan sang oportunidad si Guo kag ang iya kampo nga magpasa sang counter-affidavit apang wala man nagapamati.

Pahayag pa ni Vasquez, daw kaangay nga ginhulat pa sang dismissed mayor nga manugtapos na ang preliminary investigation kag gulpi man ini nga nagguwa. Matandaan nga sa iya statement, gin-insister ni Guo nga indi bastante ang mga dokumento kaangay sang electric bill agud makapamatuod nga involved siya sa human trafficking.