ROXAS CITY – Padayon nga magapatigayon sang job fair ang katapo sang Department of Labor and Employment (DOLE) Capiz sa nagkalain-lain nga lugar sa probinsya.
Sa interview sang Bombo Radyo kay Mr. Joselito Dela Banda Chief sang Department of Labor and Employment (DOLE) Capiz, ginpahayag sini nga tinutuyo sini agud mabuhinan ang numero sang unemployment rate sa probinsya kag mapalapit sa mga nagapangita sang trabaho nga nabudlayan mag-apply.
Suno kay Dela Banda, may yara sang 20 ka mga employers nga nagikan sa nagkalain-lain nga kompanya, national kag local agencies.
May yara man sang ginatan-ay nga libre nga skills training kag demonstration ang pila ka technical schools.
Dugang pa ni Dela Banda nga sa ginpatigayon nga job fair, dako ini nga oportunidad sa tanan.
Bangud sini, tuman ang ila kalipay bangud sa nagtakop nga job fair sadtong Mayo 1 kag 2 masobra 50 ang napagkit nga hired on the spot.
Ginganyat man ni Dela Banda ang may huyog kag nagapangita sang trabaho nga magpakigbahin sa ila ginapatigayon nga job fair.
