DOTr, indi anay magpanagtag sang Fuel Subsidy bangud sa pagnubo sang presyo sang petrolyo

Ginpahibalo sang Department of Transportation (DOTr) nga indi anay sila magpanagtag sang fuel subsidy sa mga drayber kag operator sang pampubliko nga salakyan bangud sa pagnubo sang presyo sang petrolyo sa kalibutan.

Suno kay DOTr Secretary Vince Dizon, wala pa nalab-ot ang presyo nga $80 kada bariles sa diin amo ang gintalana nga threshold antes sila magpanghatag sang bulig.

Gani, bisan pa sini, ginpasiguro ni Dizon nga andam na ang ahensya nga magpaguha sang ayuda kun malab-ot na ang nasambit nga presyo.

Nahibaluan nga ang fuel subsidy kabahin sang programa sang gobyerno agud buligan ang transport sector, labi na gid ang mga PUV drivers kag operators, nga tuman nga naapektuhan sang pagtaas sang presyo sang krudo.