Hugtanay paha na bangud sa big-time oil price hike subong nga adlaw sang Martes.
Ini na ang ika-siyam nga semana sang pagpasaka sang presyo sa gasolina kag ika 11 nga beses para sa diesel kag kerosene bangud sa padayon nga conflict sa Middle East.
Sandig sa data nga ginpaguwa sang Department of Energy (DOE), natalana nga magpasaka sang presyo sang gatong ang mga retailers:
Gasolina – ginabanta may pagsaka sang P7.00 tubtob P13.00 kada litro
Diesel – ginabanta may pagsaka sang P17.50 tubtob P24.25 kada litro kag;
Kerosene – ginabanta may pagsaka sang P32.00 tubtob P38.50.
Ini kasunod sang pagsirado sang Strait of Hormuz, isa ka key global shipping corridor nga nahamtang sa tunga sang Iran kag Oman, bangud sa padayon nga tension sa Estados Unidos, Israel kag Iran.
Suno kay Department or Energy Sec. Sharon Garin, nagapakig-angot na sila sa Department of the Interior and Local Government (DILG) kag sa Philippine National Police (PNP) agud mapabaskog pa ang monitoring batuk sa posible hoarding kag profiteering sa pagbaligya sang produktong petrolyo, matapos makabaton ini sang reports kag ebidensya nga may yara sang iregularidad nga nagakatabo sa pila ka mga lugar sa pungsod.
Natalana nga maghatag sang fuel subsidies ang gobyerno para sa public transport operators, mangunguma kag manugpangisda kag mag tantag sang libre nga bus rides agud mahagan-hagan ang epekto sang mataad nga presyo sang gatong.
Una na nga ginpahayag ni President Ferdinand “Bongbong” Marcos Jr. nga magapasa siya snag formal request sa Kongreso nga hatagan siya sang otoridad nga temporaryo mabuhinan ukon ma-suspend ang excise taxes sa gatong.
