ROXAS CITY – Nagpasalig si Department of Public Works and Highways (DPWH) Asssistant Regional Director Jose Al Fruto nga magapatigayon sang imbestigasyon, evaluation kag site inspection ang ila talatapan sa mga proyekto sang Capiz 2nd Engineering District sa segundo distrito sang probinsya.
Ini ang ginpahayag ni Al Fruto sang mainterview sang Bombo Radyo.
Ini may kaangtanan sa pagpasaka sang panumbungon ni Tapaz Mayor Roberto Nonong Palomar sa anom ka mga empleyado sang Capiz 2nd Engineering District sang DPWH sa indi insakto nga accomplishment report sa ginakaayo nga dala sa Barangay Artuz sang amo nga banwa.
Mahibaluan nga nagpasaka sang panumbungon nga Falsification of Public Document or Official Records kag Violation of the Anti-Graft and Corrupt Practices Act ang amo nga alkalde batuk kanday DENE B. BALDONADO JR., (OIC District Engineer); ARJAY B. TIBOR (Provincial Project Engineer); IAN EVEN BERING (Provisional Project Inspector); NORY BACATIO (Records Officer) kag MARIA MERLIE D. BELARMINO (OIC Construction Section).
Ginpahayag ni Al Fruto nga nakalab-ot na sa ila ang report kag sa DPWH Central Office ang anomaliya sa pagpakaayo sang mga proyekto sa segundo distrito rason nga magapatigayon sila sang nagakaigo nga site inspection sang Nobyembre 24.
Samtang, nagahinyo naman si League of Municipalities of the Philippines (LMP) Capiz Chapter Pres. Mambusao Mayor Leodegario Jun Labao Jr., nga ipatigayon ang bidding sang mga proyekto sa Capiz 2nd Engineering District sang DPWH kag indi sa regional office kun indi pa maresolbar ang nasambit nga mga problema.
Apang, nagsabat naman si Al Fruto nga wala sila sang kinamatarong nga maghimo sang desisyon nga wala sang mando nagikan kay Sec. Mark Villar sang DPWH.
Ini bangud nagasunod lamang sila sang instruction nagikan sa central office.
