ROXAS CITY – Temporaryo nga nagaserbi karon bilang Officer-in-Charge (OIC) sa Capiz Provincial Health Office (PHO) si Dr. Evelyn Bolido.
Ini ang ginkompirmar mismo sang tagpamaba sang talatapan nga si Mr. Ayr Altavas sang mainterview sang Bombo Radyo.
Suno kay Altavas nga kasunod ini sang pag-file sang leave sang sadto anay OIC nga si Dr. Leah Del Rosario sadtong Hulyo 27, 2020.
Ginpahayag ni Altavas nga desisyon mismo ni Capiz governor Esteban Evan ‘Nonoy’ Contreras nga temporaryo nga ipahamtang sa amo nga posisyon si Bolido.
Mahibaluan nga si Bolido man ang Medical Specialist IV kag hepe sang Technical Services Division sang nasambit nga talatapan.
Ginpasalig naman ni Altavas nga magapadayon ang ila pagbulig sa gobyerno-probinsiya sa mga lihok sa kampanya kontra coronavirus disease (COVID-19).
