ROXAS CITY – Bukas nga ginbaton ni Dr. Florencio Luching ang pagpili sa iya bilang panibag-o nga hepe sang Roxas Memorial Provincial Hospital (RMPH) ni Governor Fredinil “Oto” Castro.
Sa interview sang Bombo Radyo kay Dr. Florencio Luching, Chief Hospital sang RMPH ginsiling sini nga
ginbaton niya ang katungdanan nga ginhatag sa iya sa rason nga maayo ang plano ni Gov. Catro para sa ospital.
Suno diri, ginsiling ni Gov. Castro nga ba-se sa iya pagpanalawsaw nangin maayo ang iya performance kun sa diin siya ang ginalantaw sang gobernador nga makapatuman sang tinutuyo nga mahatagan sang maayo nga serbisyo medical ang pumuluyo sang probinsya.
Mahibaluan 18 ka tuig na sa serbisyo si Dr. Luching nga nagdugay bilang hepe sang ospital sa Mambusao District Hospital kag 6 ka tuig ang nakaligad nangin hepe man siya sa RMPH, apang sang nakaligad nga administrasyon sa OPD Lanot lamang ini gin-asignar sumugod 2019.
Dugang pa sang Doktor, gindiskusyonan nila sang gobernador ang maayo nga himuon sa mga reklamo sang personel kun sa diin iya man pagalantawon ang anay sistema kag ipasibu ang maayo, pagaislan naman kun indi maayo ang sistema.
Ginhinun-anon man ang pag-ilis sa mga personel sang ospital, apang ginsiguro sang gobernador nga igaba-se sa performance sang mga personel ang pag-ilis sa ila kag indi pagbasehan kun sin-o man ang ila ginboto sang nakaligad nga elesyon.
