ROXAS CITY – Dakop ang driver kag kaupod sini nga pahinante sang isa ka tanker truck matapos makuhaan sang droga kag mga armas-luthang sang mga kapulisan sa Barangay Dinginan, Roxas City.
Ginkilala ang mga nadakpan nga sanday German Manatad, 37 anyos, driver sang trak nga residente sang Cagayan de Oro City kag ang pahinante nga si Dexter Mape, 25 anyos sang San Antonio, Quezon province.
Suno kay Police Lieutenant Colonel Ricardo Jomuad Jr., hepe sang Roxas City Police Station, drug buybust ang amo nga operasyon kaupod ang Philippine Drug Enforcement Agency (PDEA) apang natiyempuhan man nga nakuhaan ang mga suspek sang mga armas-luthang.
Kalakip sa narekober sa mga ini ang apat ka sachets sang shabu, pila ka mga drug paraphernalia, isa ka calibre .45 nga armas-luthang, isa ka M16 rifle, mga bala kag iban pa.
Suno sa naaresto nga si Manatad, wala sila sang ideya natuhoy sa mga narekober sa ila bangud ginpadala lamang ini gikan sa Bacolod kag dal-on sa Batangas.
Ginpahayag sini nga natalana sila mag-deliver sang ‘Molasses’ kag ginpa-ulayhon lamang ang amo nga padala sa ila nga wala man nila ginbukad.
Gin-ako naman ni Manatad nga nagagamit ini sang ilegal nga droga apang nagpanindugan nga wala siya sang ihibalo natuhoy sa ginpadala sang wala matumod nga persona sa ila.
Ginpahayag naman sang pahinante nga si Mape nga nag-untat lamang sila sa amo nga lugar agud magpahuway matapos mahibaluan nga may yara sang truck ban.
Apang sa ila kakibot, may nagpalapit nga mga otoridad kag didto nabukadan ang ginpadala sa ila nga may mga unod nga armas-luthang kag ilegal nga droga.
Ginkompirmar naman ni Punong Barangay Elizabeth Santiago nga indi sang residente sang Barangay Dinginan ang duha ka mga persona nga nadakpan sang mga kapulisan.
