Patay ang driver sang motorsiklo matapos mabungguan sang truck samtang ginasubay ang dalanon sa may bahin sang Barangay Bilao, Sapian
Ginkilala ang driver sang motorsiklo kay alyas “Regie”, 35-anyos kag residente sang Barangay Agtatacay Sur samtang ang driver suspect ang ginkilala kay alyas “Clar” , 58-anyos kag residente sang Barangay Gogo Estancia Iloilo.
Sa impormasyon nga nakuha sang Bombo Radyo sa Sapian MPS, ginpahayag nga samtang ginasubay ni alyas “Regie” ang dalanon sa nasambit nga lugar padulong kun tani sa Phase 2 Housing Barangay Bilao, Sapian Capiz aksidente ini nga nabungguan sang water tanker nga kasugata sini.
Bangud sa pagkabunggo nag-angkon sang pilas sa magkatuhay nga parte sang iya lawas si alyas “Regie”.
Gilayon man ini nga ginrespondihan sang mga katapo sang Sapian MDRRMO para sa pauna nga pagbulong antes ini ginpadangat sa ospital.
Sa karon, dalayon naman ini nga ginbawian sang hulam nga kabuhi samtang ginabulong sa ospital.
