Nag-angkon sang kahalitan ang isa ka lotto outlet kag istakan sang uling matapos nga ginpahayag nga nadulaan sang kontrol sa manubela ang isa ka 10-wheeler truck sa bahin sang Crossing Talabahan, banwa sang Ivisan.
Ginkilala ang driver sang truck kay alyas “Robert”, residente sang Brgy. Sta. Cruz, Ivisan, Capiz. Samtang, ang pahinante naman ang ginkilala kay alyas “Narciso”, residente sang Poblacion Ilaya, Ivisan, Capiz.
Sa pagpakig-angut sang Bombo Radyo kay PSMS Ham Pastellano, Traffic Investigator sang Ivisan MPS, nagikan sa banwa sang Sigma ang truck nga may karga nga plywood kag kabilya nga padulong kuntani sa Poblacion Ilaya sa nasambit nga banwa sang hinali nga wala sini makontrol sang mayad ang manubela sang may nahulog nga kabilya sa likod nga porsyon sang truck kag ginhungod nalang nga ginbunggo sa gutter sang karsada nga kun sa diin nakahamtang ang nasambit nga lotto outlet kag istakan sang uling sa lugar.
Nahibaluan nga ginapanag-iyahan sang RJK Hardware ang amo nga truck.
Bangud sa natabo nga insidente, nag-angkon sang gasgas sa nawala nga kamot ang pahinante sang truck kag maswerte nga wala sang napilasan nga iban pa nga yara sa amo nga lugar sang natabo ang insidente.
Sa karon, yara na sa kustodiya sang Ivisan MPS ang nasambit nga truck samtang, ang driver kag pahinante naman ang nakapauli na sa tagsa sini ka mga puluy-an, bangud pagasabton sang tag-iya sang hardware ang nagkalaulamid nga mga pagkabutang sa natabo nga insidente.
